22. apr. 2018

Litterær klassikar, vårvêr og kaffi frå ein Mummikopp

Tenk at me er over halvvegs i april allereie. Dette året har til no gått litt for fort. Eller altfor fort. Men det positive er at det ikkje er lenge til eg får sjå min kjære igjen. Lykke! Våren med alle dei fine blomane, varmare vêr og blå himmel har vore røynda denne veka. For når dagane er slik ute, blir alt så mykje enklare, lysare, finare (vêrsjuk, eg?). Sykle til jobb med sola i andletet omtrent kvar dag, høyre fuglane kvitre, ikkje lenger trenge å ha på meg ullstrømpebukse. Dvoraks 9. symfoni ("Fra den nye verden på orkesterøving, produktive dagar på jobb, frisørbesøk og tid til lesing er noko av det som gjer at eg oppsummerer denne veka som fon og bra. Resten kan de sjå under:

✦ kaffi og den fjerde boka i Anne-serien: Anne of Windy Poplars
✦ alltid koseleg å starte helga med å besøke ei veninne
✦ og at ho veninna mi fekk meg til å sjå den fyrste episoden av Friends
✦ roper høgt hurra for mindre plastemballasje i butikken
✦ vårdikt av Olav H. Hauge i avisa Dag og Tid
✦ rydde i klesskapet
✦ miniserien Paul Merton's Secret Stations (Med somletog i Storbritannia) på NRK Nett-TV
✦ og på grunn av dette programmet: "Britian's forgotten railway stations"
✦ gråte, le og gråte endå meir av filmen Third Star med bl.a. Benedict Cumberbatch og Tom Burke
✦ "Hvorfor blogger jeg egentlig?", godt skrive og godt å lese inne hos Ann Merete
✦ tok tid å lese den ut, men likte veldig godt slutten på klassikaren Den gamle mannen og havet
✦ eit andepar som hadde gått frå Mosvatnet og opp til blokkane våre
✦ søte, små beaglevalpar
✦ Endeavour (eller Unge inspektør Morse), for britisk krim er den aller, aller beste
✦ presskannekaffi i Mummikopp før husarbeid (og ein sniktitt på den hekla løparen)
✦ gult er kult, denne gongen med hestehov langs vegkanten på veg til jobb
✦ "11 A.A. Milne Quotes That Are as Sweet as Honey"
✦ gå ein liten tur rundt Vannassen, ikkje tenkje på noko som helst
✦ stort smil fordi eg var hos frisøren her om dagen, no er eg klar til ferietur
✦ vårblome i nabolaget

20. apr. 2018

Eit par nye innkjøp

Så klart drog eg ikkje til Kongsberg førre helg for å storhandle, men sidan me var innom byen både fredagen og laurdagen, titta me inn i nokre butikkar og jaggu meg fann eg både det eine og det andre. Har lenge tenkt at eg skulle ha hatt ei jakke som eg kan bruke no når det endå er tidleg vår (den kom jo seint i år) og utpå seinsommaren. På Vero Moda fann eg den perfekte parkasen: passe lett og med snøring i midja. Fann elles ein genser med det kulaste mønsteret, serviettar i same mønster som gryteklutane våre og sennepsgule lys, dei to siste frå Kremmerhuset. Ein liten pose med krokansjokolade fann eg også, og på ein gjenbruksbutikk fall blikket mitt på to bøker av sjølvaste krimdronninga. Ganske så nøgd med desse kjøpa, ja. Kos deg, for no er fredagen her!

19. apr. 2018

Artige, fargerike detaljar på Kongsberg bibliotek

Skulle eigentleg ta ein ordentleg runde på biblioteket i Kongsberg, kanskje setje meg ned ein liten augeblink med ei bok i fanget. Men eg blei forsinka ut døra, og derfor blei det ikkje "den store biblioteksturen" som eg hadde sett for meg. Likevel fekk eg sett meg litt rundt saman med broren min. Eg fall veldig for fargevalet, og dei bua bokhyllene gjer lokalet mykare. Ei eiga skofri barnesone blant alle dei flotte fargane og så stod eg nesten og lo då eg såg krimavdelinga. "Crime scene – do not cross" på knallgule teipband og spor av eit lik i taket – av alle plassar! Å besøke biblioteket i kvar nye by eg besøker er blitt den nye greia. Eg berre diggar det!

18. apr. 2018

Postkort og kafébesøk

Postkort frå Kongsberg. Heile helga var fylt med solskin, hygge og fine folk. På fredag skulle veninna mi på jobb, og eg tok meg ein tur inn til sentrum på eiga hand. Hoppa og dansa av garde, for det var så herleg å kjenne sola varme, kjenne at det no er vår. Før eg traska over gamlebrua, stoppa eg opp og tok eit par bilete av elva, nye og gamle brua og kyrkja i det fjerne (tatt med mobilen, det eg tok med speilrefleksen blei dessverre ufokusert). Vel over brua og inne i den gamle delen av byen, Vestsida, fann eg denne saken i grønt og gult. Det er sånt som fangar blikket mitt.


Broren min studerer jo i Kongsberg, så eg hadde avtalt å møte han den dagen. Møtte han ved biblioteket som ligg i same bygget som skulen hans (Høgskolen i Sørøst-Norge). Eg tok eit par bilete med mobilen inne på biblioteket, tenkjer å vise dei i morgon. Etter å ha vore der ei bittelita stund, gjekk me til ein kafé i nærleiken, nemleg Kåre João. Veldig koseleg atmosfære med retro møblar, god kaffi og vaffel. Me sat der i alle fall ein god time, berre prata og slappa av. Traska så vidare til den nye delen av sentrum der eg sa "ha det" til broremann og åt middag med veninna mi.

16. apr. 2018

Med toget til og frå Kongsberg

Sju timar på tog er lenge, til og med eg som er glad i å ta tog synest det. Men sjølv om eg innimellom lengta etter å strekke på beina og kjenne frisk luft, var det ein fin togtur der eg fekk slappe av, la tankane vandre. Køyrde fyrst forbi Sandnes i strålande sol og tok etter kvart fram bok og kaffi. For det må ein ha med på togtur. Nodeland stasjon med ein herleg farge og på ein annan stasjon ein knallraud togvogn. Har alltid likt stadnamnet Nordagutu, og nå fekk eg endeleg tatt eit lite bilete av det. Sånn i farta. Sola skein inn og eg hadde solbrillene på gjennom heile turen.


På veg heim, altså i går, blei det berre to bilete, tatt med mobilen. Var mange folk om bord på toget og då byrja ikkje eg å dra fram speilrefleksen ;) Koste meg no uansett med ein liten Kvikk Lunsj, kaffi og bok. Sov litt, titta ut av vinduaget og ned på togskjenene som fauk forbi. Toget var ein snau halvtime forsinka inn til Stavanger, men det gjorde faktisk ingenting. For togtur er ganske fint!

15. apr. 2018

Endeleg vår, endeleg fotobok og super langhelg

Som sikkert veldig mange andre denne helga, har eg vore glad og verkeleg nytt vårvêret. Kaffi om morgonen ute i solveggen hos veninna mi på Kongsberg, kan det bli betre?! Arbeidsdagane gjekk som normalt måndag, tysdag og onsdag, og det same med orkesterøvinga tysdagskveld. Torsdag derimot stakk eg av garde med toget til Kongsberg og det blei ei kjempefin langhelg saman med ei god veninne som eg kjenner frå folkehøgskulen. Fekk også møtt broren min på ein koseleg kafé der me tok kvar vår kaffi, åt ein vaffel og prata. Alltid veldig kjekt med ei slik helg og det gjorde godt å få treffe ho veninna mi igjen (det går nemleg litt for lenge mellom kvar gong som me klarer å møtast). Og tenk – i dag er det berre tre veker igjen til eg reiser! Vår i lufta og mykje bra på lista:

✦ veldig kjekt å gjere ferdig og få fotobok frå bryllaupet vårt i posten (etter nesten tre år)
✦ langhelg på Kongsberg, fleire bilete kjem ;)
✦ kan ikkje minigrisane alltid vere så små og søte, slik som @mybestfriendhank?!
✦ Numedalslågen mellom vinter og vår
✦ frå førre sundag, men like fin i dag også: "Ønsker for søndag" inne hos Ine
✦ starte laurdagen med å drikke ein kopp kaffi i solveggen
✦ den fyrste episoden av ein animert og herleg serie om gatekatten Bob
✦ når ein ser at folk byrjar å setje seg ned på benkane ved Breiavatnet, då er det vår
✦ fint skrive om det å ønske eit heilt vanleg, fint og middelmådig liv via Julianne
✦ fin bok, nemleg Vente på fuglen
✦ hurra for fjerning av plastbestikk, håper fleire gjer det same
✦ fargerik, fin og bua bokhylle på Kongsberg bibliotek
✦ likte godt kaffikoppen eg drakk frå hos veninna mi og det stilige teppet som låg i godstolen
✦ tenk å bli fridd til ved å løyse eit kryssord
✦ gjere litt fransk kvar dag
✦ kul gatekunst, diggar Stavanger for akkurat dette
✦ stas frå Stavanger: to Cannes-prisar til Lykkeland og kjempemelding av restauranten Tango
✦ vår på torget
✦ lese mykje på toget, både veg til Kongsberg og på heimvegen

13. apr. 2018

Få, men treffande ord

Mikronoveller. Små historier som ein gong blei publisert på Twitter. Frode Grytten gav ut ei bok i 2014 med nokre av hans beste mikronoveller, tatt frå hans Twitter-prosjekt. 140 teikn. Mykje kan seiast på få ord. Over ser du nokre av mine favorittar frå boka Vente på fuglen. Denne fredagen og resten av helga er eg i Kongsberg for å besøke ei god veninne og treffe broren min. Bra helg!