19. mai 2018

Peggy's Cove

Vanskeleg å plukke ut berre eit bilete. For me var superheldige med vêret og ute på Peggy's Cove var det vakkert. Rett og slett nydeleg. Eg har jo sett fyrtårn og svaberg før, men likevel var det storslått. Gå rundt på eit svaberg med der me innimellom måtte hoppe frå ein stor stein til ein annan. Sjå utover havet, kjenne sjølukta. Det raude og kvite fyrtårnet mot den knallblå himmelen.


Prøvde å ta ein selfie med fyrtårnet i bakgrunnen; ein kan vel trygt seie at det eine blei meir vellykka enn det andre ;) Hi, hi, synest no dei var fine begge to likevel. Peggy's Cove er ei lita bygd som ligg ved kysten, litt nord-aust for Halifax sentrum. Alle dei små, fargerike husa, så søte og idylliske. Også her ute fekk me høyre sekkepipemusikk, og den eine songen var til og med den same som ved Citadel Hill. Stod på svaberget og såg ut på sjøen, titta meir på fyrtårnet og på veg ut frå bygda, stoppa me opp fordi eg ønska å sjå nærmare på det (veldig) lilla huset og den fine kyrkja med raudt tak. Viss du plutseleg skulle vere i Nova Scotia, er Peggy's Cove ein "må-sjå-plass".

18. mai 2018

Citadel Hill

Etter å ha ete ein god frukost, var det på tide å sjekke ut og komme oss vidare. Planen var å stikke innom Peggy's Cove og Lunenburg før me køyrde heim til Moncton. Før me tok ordentleg fatt vidare frå Halifax, var me ein tur oppe på Citadel Hill. Dette er eit stjerneforma fort (stjerna kan de sjå på her). Konstruksjonen byrja i 1749 då Halifax blei grunnlagd, men den som står der no er den fjerde versjonen, laga mellom 1818 og 1861. Hadde me tenkt oss om, hadde me lagt inn betre tid slik at me kunne få omvisning med guide. Men, men. Fascinerande å sjå likevel. Ei smal trapp førte oss opp til toppen, og der var det jaggu med ein som stod i kilt og spelte sekkepipe. Nova Scotia betyr jo "Nye Skottland", og det var tidleg skotsk busetting i provinsen. Store kanonar og kanonar i alle storleikar såg me fleire av. Sidan me var der relativt tidleg, var det god plass til oss alle.


Ikkje fullt så enkelt å eksponere riktig når sola står høgt på himmelen og skin som aldri før. Men me fekk no ei grei oversikt over byen om ikkje anna :) I sjølve borgmuren såg me nokre gamle master frå to båtar og ein annan plass gjekk det ei trapp ned til eit stort hol. Nedst til høgre i kollasjen kan ein skimte den gamle byklokka. Ein flott start på ein super dag.

17. mai 2018

Viftar med flagget og roper høgt "hurra" 🇳🇴

Ingen bunad i år, ikkje korps eller kransekake. Det er fyrste gong eg ikkje har på meg bunaden på 17.mai på ni år og førre gong eg var utanlands var eg vel eitt år. Men, men, me feirar likevel nasjonaldagen i Noregs flotte fargar. Ja, for du ser vel at eg har raude og kvite klede og blå brosje, sko og øyredobbar?! :) Utpå dagen blir det ein god lunsj på kafé før me skal ete middag hos professoren som er mentoren til mannen min her ved universitetet i Moncton. Heime hos han og kona og det blir ei grei avslutning på dagen. Hipp, hipp hurra for 17. mai, også her i Canada!

16. mai 2018

Halifax

Skulle gjerne hatt litt betre tid i Halifax, for det er ein fin by og det var mykje me ikkje rakk å sjå. Men slik er det nokre gongar. I ei av gatene låg det fargerike hus på rekkje og rad, minner meg om Fargegata heime i Stavanger. I eit av husa bur nok "gatas heks". I alle fall i følgje skiltet. Stakk innom vintagebutikken Elsie's Clothing. Fann ikkje noko som eg berre måtte ha, men det var ein akkurat passe herleg og fargerik butikk. Og den raude kjolen var jo ganske fin og søt.


Me overnatta på koselege Garden South Park Inn. Det ligg veldig sentralt, så det var berre å parkere bilen og gå rundt i byen. Så rart å sjå kontrasten mellom den gamle, store kyrkja og dei nye og endå større bygingane. Noko av det finaste var å sjå regnbogeflagget på gata som eit fotgjengarfelt :)


Når eg går rundt og vandrar i ein ny by, er det alltid like spennande å sjå på dei forskjellige bygningane, oppdage små og store detaljar. Hus i friske fargar, smale trapper (og visstnok ein kafé med namnet Narrow Espresso) og gamle hus midt blant store, nye blokker. Lita oppdagingsferd!

15. mai 2018

Køyretur til ein ny provins og ein fin hage


I helga var me som nemnt ein tur til provinsen Nova Scotia. Me leigde ein bil og køyrde ut etter frukosten laurdag morgon. Køyreturen inn til houvdstaden i provinsen, byen Halifax, tok omtrent tre timar. Lange og store vegar og mykje skog. Mykje av vegen var også veldig flat, "flatare enn Jæren" som broren min sa då han såg det eine biletet ;) På vegen stoppa me ved turistsenteret, men det var stengt. Fekk no eit bilete av velkomstskiltet om ikkje anna. Måtte også ha ein kaffi og ein matbit, og då blei det eit stopp på Tim Hortons. Me var vel ikkje heilt overbevist, men det var no mat og kaffi, mao. betre enn ingenting, så kan ikkje klage på det. Ikkje enkelt å ta bilete gjennom bilvindauget, men gjorde no eit forsøk då me køyrde over ei bru, ikkje langt frå sjølve byen.


Vel framme i Halifax, sette me frå oss bilen ved B&B-en der me skulle bu (innsjekkinga var ikkje før tre) og traska litt rundt i nærområdet. Biblioteket blei besøkt og me fann den offentlege hagen. Ein herleg grøn oase i sentrum. Tulipanar i vakre fargar, eit minihus ved ei minielv, tre som blomar og ein vakker paviljong. Hadde vinden blåst litt mindre, hadde me vore der ei stund med kvar vår bok.